地址：鵪鵠茶餐廳
www.unclecafe.blogspot.com
電話：(你的用戶組不能顯示此資料）
電郵：hooami1986@gmail.com
2009年5月29日
===================================
阿喂邊個邊個靚仔老細
對象名銜：某國際大公司個大粒佬，最話得事個個
公司：梗系某國際大公司，足以影響全球經濟個個啦。
地址：都話係國際大公司咯，
求其行街都見到佢張相個只，
係人都識啦，仲問地址？妖～
阿喂邊個邊個靚仔老細您老人家好：
在下陳某，家中兩老加一家姐，廿年來吃飽飯沒事做，係屋企黏飲黏食，行街睇戲撩女仔，無么建樹。弊在現下正逢大學畢業，啱啱過到骨。上排又金融風暴，家下又撞正甲型流感H1N1。屋企斷我米糧，話養我甘大係時候我負返滴責任，就算養唔起佢地老人家，我都唔好意思下下返屋企度水。正所謂上有高堂，下有凄涼。人人都話畢業就應該正正經經搵返份工，出返份糧，做個對社會有用處的人。但對我黎講就只係打算升官發財娶老婆。無計啦，人地個個都搵工，我就順勢跟返個潮流，都搵返份工啦。我都知家下亦都潮流興炒人魷魚，不過如果您老人家首肯，先請咗我再炒我，等我又去另外再跟返個潮流多一次我都唔mind嘎。你又可以跟返個潮流，我又可以跟返個潮流，你Happy我亦都Happy，正所謂一家便宜兩家著吖嘛。
講返點解在下屬意貴公司，其實都幾簡單直接，須知貴公司街知巷聞，念下行出街，人人都見到貴公司個名，。甘至少加入貴公司當我面對啲親戚朋友問起我姓行唔駛解釋甘多，講完個公司名又要解析公司做些咩，響邊度...貴公司就唔同喇，韃個躲出黎，就係人都“哦～”著實慳返唔少口水。第二點呢就都係因為貴公司嘅知名都啦，甘樣至少第一日返工就算蕩失路，周街搵人問都仲係可以準時返工。你都知喇，第一日返工遲到唔好吖嘛...更重要嘅就係絕唔會千唔撿萬唔撿，偏偏撿著個爛燈盞。至于本人，我身高爭一公分至170，有480度近視，崎哩啡面孔，身材偏瘦兼有少少肚腹--總結既係：“我唔靚仔”，唔靚仔，就唔會響公司度同你爭做最靚仔個位；更唔會搞到公司啲女同事神魂顛倒三魂不見七魄，降低嗮地辦事效率；更重要係唔會搞辦公室戀情，搞亂嗮啲人事關系...另外我份人雖然就唔聰明，唔話頭醒尾，但亦都勝在唔會強出頭，起碼唔會係第一個帶頭示威公司福利唔夠好搞罷工。平時只要老細一句我就在所不辭兩胁插刀（當然係講黎好聽嘎啦），不過都算係憨憨居居，易被人砌生豬肉，揹黑鑊，行又行先，死又死先，企就企兩邊，老細睇啱點女滴水不沾。
介紹咗甘多，其實我嘅要求就唔係好高，求求其其有返個靚女秘書仔;每個月有兩三萬出入;出街架公司車最好係馬賽地七系列；有司機接送；每年放返我兩三個月假期連機票去歐洲度假，但係如果遇上經濟蕭條縮水到去臺灣我都唔所謂，日本就唔好去大阪啦，最近甲型流感應吖嘛；職位就求求其其封個CEO或者COO，工作范圍行行企企十一點返工，四點放工，一個禮拜返十二個鐘。滿足到以上要求嘅話我而家即刻撲到上你Office立即開工（不過你就唔好過咗四點凈話復我，要計加班，破費吖嘛）。
拿，我講得甘有誠意，希望你認真考慮一下叻，真係要認真甘去考慮喔，我甘嘅人才，又唔靚仔，又識得為公司慳錢，呢個世道無幾個，絕對接近絕嗮種嘅啦，（choi～圙口水講過）...我係你就圙飯應喇～
誠意拳拳嘅，
陳某
您公司未來的CEO或COO
囧rz
回覆刪除