光陰

關於時間消逝嘅感慨，唔會少。

年輕時先生教落：“一寸光陰一寸金，寸金難買寸光陰”
當時教科書只教落呢比喻時間嘅寶貴過黃金，一旦過去就贖唔返嚟。

而家睇返呢句說話，反而有啲酸酸嘅感覺。
我唔知當年作者寫下呢句說話嘅時候，有無國際金價，有無經濟指數。
如果真係咁想買，又點會只用一寸嚟買，買唔到就罷就？
引人遐想，係咪十寸金就買得返啲時間呢？
另外一寸光陰，係咪用滴水漏斗滴完，用把尺去度呢？定係沙煲咁大嘅桶呢？

林夕下面呢句可能更加易明：
“你獻出了十寸時和分，可有換到十寸金？”
一寸光陰換到一寸金，恐怕無幾個人辦得到。
而可以用光陰嚟換金嘅，恐怕亦都只有文明社會嘅打工仔先至有資格。
有嘀人，可能用盡咗一生哀嚎，等待一口乾糧，天降甘露。
到死，未知道有可以用時間嚟換一餐飽飯吃。
到死，未知道有飽肚呢回事。
黃金？嗬嘅都未必有。



第一句“一寸光陰一寸金”嘅解法，應該係一種排比手法，解作“一寸光陰好似一寸金咁寶貴”嘅人，不單只未搞明時間到底有幾寶貴，甚至可以話係不知道咩叫人間疾苦，連揾錢艱難都未搞明。

因此時間令人惋惜。
惋惜嘅，不但只時間本身，
而係過咗去嘅時間入面嘅人事和物。
等過嘅人，一起做嘅事，講過嘅說話，觸摸過嘅觸感。
眨眼孑然一身，人事已非，再也不可似當年一樣，談笑自若。
身體亦不似當年，可以蹦跳20小時，闔眼一陣，第二日又一條好漢。
只見當年一小時搞掂嘅事，可能變成兩小時。
嘆一聲：時間又少咗。

未過去嘅時間一樣令人惋惜，
感嘆佢嘅少，一眼望去有著無限嘅潛力同可能
但係少。
眼前係一個又一個嘅限期。


等，變成很多人無法承受嘅煎熬。
急，變成好多人嘅習慣。
快，係標準嘅期待。

但如此繃緊嘅看待時間，已無法享用時間帶來嘅歡愉。

有時急得嚟，反而變成要等，反而錯過更多。
有時甚至兜多幾轉冤枉路。
會係度唸：“慢慢嚟，比較快”。
但迫到牆頭，又唔記得了。

同時間交涉，係人一生嘅作業。
時間本身，可能就係死神。