21·12·12

世界末日
係一個腦爆嘅問題。

係指呢粒波成個變成粉碎？
定係單單指啲貓貓狗狗同呢個星球嘅某種嚴重污染破壞性嘅靈長類生物滅絕？
亦係話單單係呢類靈長類生物滅絕？
可能只係無喇喇無咗Facebook上？




無咩好擔心。
一係冚人類死嗮，無麼好唸喇？堆積如山嘅屍體，就等啲動物當災糧搞掂佢啦。
一係未死嗮，即係未世界末日喇？要煩嘅，就等啲死剩種去煩咯。
據說不斷有人詢問NASA，係咪世界末日。
我估都無人敢篤定幾時係世界末日：“點知係咪真係死得嗮啊？”

如果係呢粒波粉碎嚟？無咩好唸啦，你唔帶走啲咩，你亦唔會留底啲咩。
一切係零。

你響22·12·12前死嘅機率，肯定大過21·12·12係世界末日嘅機率。
而你死咗，同你係世界末日死咗，對你黎講應該無咩分別。
但對你周圍啲人黎講就大分別喇。
如果世界末日，無得唸。
如果“唔夠世界末日”，你就煩啦。
尤其係你就係我之前提到個啲，死剩嘅。
你首先要跑，唸求生，可能要等水停，可能俾石頭砸到，可能斷一只腳，
可能到一個階段突然想死埋去。
可能仲要擔心滿地屍體感染到你病，病又沒藥食。

世界末日最令我欣賞嘅地方，就係唔駛擔心保險有無得賠。

據講天災來臨前動物都特別敏感，出現大批流動景象。
但此為求生。
若知死梗，恐怕只會水靜河靡。
---去邊？

但唔逃，又點知死梗？
令人恐懼嘅，恐怕唔係絕望，而係還有一線希望。
無需要問，無人可以回答你係咪真係世界末日。

或問。真係世界末日，個日做咩好？
1）向心愛人表白
除非對方將你擺在生命第一位，否則恐怕佢無咁嘅時間理你。要表白，咪等世界末日。等到世界末日，就咪去表白，多餘。
2）拿起手機拍低佢啦
如果係想upload facebook就算喇。你無機會翻睇嘅啦。留底嚟俾外星人當紀錄片睇仲差唔多。
3）搶返部Benz跑飆下。套用某歌詞，恐怕到時你先發覺呢啲其實並唔係咁重要啦。

古人講嘅杞人憂天，到現代依然發生。


若聽過已故Steve Jobs講嘅“Live Every Day As If It Were Your Last”， 如果真係做得到，聽日係咪真嘅世界末日恐怕就無咩好擔心。但係咪真係做得到。難怪佛家認為，能預知自己嘅死期，係一種福祉。

如果係積極性嘅，其實每日當聽日就末日都無咩唔妥。
可怕嘅係平時唔唸點樣減碳，減輻射，減廢物。唸埋啲會晤會世界末日
如到最後一日，呢一切再無作用，你更唔會做。
可能仲會用埋最後一口氣嚟唸緊點揸幹呢粒波上嘅資源。享受你最後嘅一口氣。
呢種寄生物，不得不叫人心寒。

以上種種。
總結粗魯啲講：世界末日，關你X事。